هێرشەکانی تورکیاو پەرتەوازەیی کورد

محەمەد ئەحمەد شەمێرانی
ڕۆژنامەنووس
یەکەمین جار نیە دەوڵەتی فاشیستی تورکیا هێرش دێنێ بۆسەر هەرێمی کوردستان بەبیانوی گەریلاکان پارتی کرێکارانی کوردستان و کۆتا جاریش نابێ، بەڵام ئەوەی گرنگە ئێمەی کورد بیزانین وەک شتێکی حەتمی و بەڵگە نەویست ئەوەیە تورک لەگەڵیدا عەرەب و فارسیش تەنها دژ بەگروپ یان حیزبێکی کوردی دیاری کراو نین، بەڵکو دژن بەهەموو ماف و دەسکەوتەکانی گەلی کورد لەهەر چوار پارچەی کوردستان بەبێ جیاوازی، بۆسەلماندنی ئەم قسانەمان ڕەنگە پێویستمان بەهەڵدانەوەی لاپەڕەکانی مێژووی کۆن نەبێ، سەیرکە لەساڵی 2017 و پاش ئەنجامدانی ڕیفراندۆمی سەربەخۆی کوردستان چۆن هەرسێ وڵاتی داگیرکەری کوردستان (ئێران، عێراق، تورکیا) لە گەلەکۆمەێکی هاوبەشدا هێرشیان کردە سەر کەرکوک و ناوچە دابڕێنراوەکان، پاشان دەوڵەتی تورکیای فاشی چۆن هێرشی کردە سەر خۆرئاوای کوردستان.

دیسان بۆردومانکردن و تۆپ بارانکردنی هاوبەشی نێوان تورکیا و ئێران و بێ هەڵوێستی دەوڵەتە لەرزۆکەکەی عێراق بۆ سەر سنوورەکانی هەرێمی کوردستان و بارەگاکانی پەکەکە و گوند نشینەکان بەسن بۆئەوەی لەو ڕاستیانە تێ بگەین.

ئێران و تورکیا وەک دوو دەوڵەتی زلهێزی ناوچەکە وخاوەن چەکی پێشکەوتوو سەرەڕای جیاوازیە قوڵ و تێڕوانینە دژ بەیەکەکانیان بۆ بەڕێوە چوونی سیاسەت لە ناوچەکە هەر لە مەسەلەی ناکۆکیەکانیان لە سوریا و لیبیا تاچەندین کێشەی تر تاکە شتێک کەکۆیان ئەکاتەوەو لەسەری هاوڕان دژایەتی کردنی کورد و دۆزە ڕەوا کەیەتی.

لەگەڵ هەموو ئەمانەدا هەر دوو دەوڵەت ئێستا لەدۆخێکی خراپی ناوخۆیدان و بە دەست چەندین قەیرانی سیاسی و ئابووری قوڵەوە ئەناڵێنن بۆ تێپەڕاندنی ئەو قەیرانانەو بەدەست هێنانەوەی متمانەی جەماوەری خۆیان وخۆدزینەوە لەکێشە قوڵەکانیان هەوڵ ئەدەن قەیرانەکانیان ببەنە دەرەوەی سنوورەکانی خۆیان و لە ڕێگەی دژایەتیکردنی کوردەوە خۆیان ڕێک بخەنەوەو جارێکی تر متمانەی هاووڵاتیانیان مسۆگەر بکەنەوە.

بەڵام ئەوەی جێی داخ و نیگەرانیە، تا ئێستا کورد خەمساردانە مامەڵە ئەکات و هیچ پلانێکی بۆ ڕووبەڕوو بوونەوەی ئەم مەترسیە گەورانە نیە، لانی کەم ناتوانێ ڕیزەکانی خۆی یەکخاتەوەو و بەیەک گوتاری ئیعلامی قسەری لەسەر بکات، لەوەش خراپتر لەباتی ئەوەی قسە لەسەر دووژمنە سەرەکیەکانی بکات وپێشێلکای و تاوانکاریە مرۆیەکانیان بەجیهان بناسێنێ و ڕای گشتی لێ تێبگەیەنێ، هاتووە توانا و وزە شاراوەکانی خۆی له ناوخۆدا و بۆ یەکتر شکاندن و یەکتر تۆمەتبار کردن بەکار ئەهێنێ.

هەموو تاکێکی ڕەسەنی کورد ئازار ئەچێژێ کاتێ ئەبینێ لەناو خاکەکەی خۆیدا و بە بەرچاوی هەموو دونیاوە دوژمنێکی سەرسەخت و داگیر کەر هێرش ئەکاتە سەر نەوەکانی نەتەوەکەی وخەڵتانی خوێنیان ئەکات بەبێ ئەوەی ڕەچاوی هیچ عورف و یاسایەکی نێودەوڵەتی بکات.

بەڵام هەموو ئەم ڕووداوانە وامان لێ ناکات کە ڕەخنە لە سیاسەتی پەکەکە نەگرین بەتایبەت لەم کاتەدا کە هەرێمی کوردستان بەدەست چەندین کێشەی قوڵەوە ئەناڵێنێ، ئەویش ببێتە بەهانە بۆ لەشکر کێشی سوپای تورکیا بۆ ناو قوڵای خاکی هەرێمی کوردستان کە ئەو هیچ شەرعیەتێکی یاسای و نێودەوڵەتی تێیدانیە، بەڵکو تەنها پاساوێکە بەدەست دەوڵەتی تورکیاوە. 

ئەم وتارە دەربڕ لە ڕای نوسەر دەکات

PM:12:11:28/06/2020



ئه‌م بابه‌ته 269 جار خوێنراوه‌ته‌وه‌‌

وتارەکانی تری نوسەر