مەترسییە بەردەوامەکانی سەر هەرێمی کوردستان

ڕاژان عەبدولڕەحمان پیرۆ
نوسەر و روشنبیر

هەرێمی کوردستان لە چەقی رۆژهەڵاتی ناڤیندا گیرۆدەی جوگرافیایەکی سیاسیە، چواردەوری بە کولتوورێکی سیاسی دەورە دراوە، لەلایەن دەوڵەتە عەرەبی و موسوڵمانەکانەوە، دژی هەر چەشنە بنەمایەکی مرۆیی و ئەخلاقین، بەردەوام هەڕەشە لە بوونی کورد و ناسنامە نەتەوەییەکەی دەکەن، خۆیان سەپاندووە بەسەر ناوچەکەدا و هەرچی پێکهاتەی غەیری خۆیانە چ ئایینی، نەتەوەیی ...هتد، لەسەروی هەمووانیشەوە؛ کوردبوونیان لە سەر زێدی ڕەسەنی باب و باپیرانی خۆیان بە بەردەوام لە ژێر هەڕەشە و مەترسی لەنێو چووندان.

سیستەمی جیهانی سەرەڕای ئەوەی لە قۆناغێک بۆ قۆناغێکی تر وەرچەرخانی سیاسی بە خۆیەوە بینی، واتە؛ لە سیستەمی هاوپەیمانان دوای کۆتایی هاتنی شەڕی یەکەمی جیهانی تاکو سەرهەڵدانی سیستەمی دوو جەمسەری، پاش کۆتایی هاتنی جەنگی دووەمی جیهانی، دواتر لە سەرەتای نەوەدەکانەوە سەرهەڵدانی گلۆبالیزم-جیهانگەرایی و سەرهەڵدانی چەمکەکانی ئازادی، دیموکراسی، مافەکانی مرۆڤ.

بەڵام هیچیان بەها ئەخلاقی و مرۆییەکانیان نەک هەر بە هەند وەرنەگرت، بەڵکو بەرژەوەندی خۆیان لە سەروی هەر چەمکێکەوە دانا، کە تەعبیر لە بەها مرۆییەکان بکات، کە بەشێوەیەکی هاوتەریب و لە سەر بنەمای بەرژەوەندی هاوبەش ڕووبەرووی کەمە نەتەوە ماف لێ زەوتکراوەکان بوونەوە، گشت ئامرازێکی ماددی و مەعنەویان بەکارهێنا، بۆ لەنێو بردنیان و بە تایبەت کورد و هەموو هەوڵێکیشیان داوە بۆ سڕینەوەی ناسنامە نەتەوەییەکەی.


شایانی باسە؛ لە رۆژهەڵاتی ناوەڕاستدا رۆژێک لە رۆژان کولتووری دیموکراسی ئاماده‌یی نەبووە تا ئێستا، ئەمەش خۆی لە خۆیدا هەموو کات مەترسی بووە بۆ سەر ئایین و نەتەوە و زمانەکانی ناوچەکه‌، نەبوونی کولتووری لێبوردەیی و پێکەوە ژیانی ئاشتیانە لە گشت ڕووێکەوە لە لایەن دەوڵەتە سەردەستەکانی ئەم دەڤەرە، دەیان کارەساتی خوڵقاندووە و دەیان قەیرانیشی بە دوای خۆیدا هێناوە، چونکە لە ئاراستە دەرچوونی سەقامگیری سیاسی و کۆمەڵایەتی لێکەوتە خراپەکان بە دوای خۆیدا دەهێنێت، هەروەک ئەوەی کە ئێمە ئەمڕۆ بە چاوی خۆمان دەبینین و رۆژ دوای رۆژ بەرەو چارەنوسێکی ڕەشتر پەل دەهاوژێت، گەلان لە بوونی سەقامگیری سیاسی و ئاشتی کۆمەڵایەتیدا بەرەو پێشفەچوون بە خۆیانەوە دەبێنن و، گەشە دەکەن. ئەمەش هەرگیز لە سەر دەستی ڕژێمە دیکتاتۆرەکان نایه‌ته‌دی، بەڵکو بە هۆی جۆرە کولتوورێکی سیاسیەوە دێتە دی، کە لەناخەوە تەعبیر لە ڕێزگرتن لە تایبەتمەندیەکانی ئەوانیتر بکات و بڕوای بە پێکەوە ژیانی ئاشتیانە هەبێت.

ئەمەش دۆزی ڕەوای کوردی بە چەقبەستویی هێشتووتەوە؛ سەرباری ئەوەی کە نەتەوەی کوردیش بە خۆی هوکارێکی گەورە بووە لە نەگەیشتن بە ئامانجی کۆتایی، بە هۆی پەرتەوازە بوونییەوە، ئایدلۆژیای "شۆفینیزم" زاڵە بە سەر ناوچەکەدا و، لەکوێدا مومارەسەکردنی کولتووری دیموکراسی هەبێت ڕووبەڕووی دەبنەوە بە هەموو توانایەکانیەوە، چونکە بە هەڕەشە لە سەر مانەوەی خۆیان دەزانن، بڕواننە "ئێراق" چۆن دژایەتی مافە ڕەواکانی کورد دەکات، سوریا بە کوێ گەیشت و لوبنان و لیبیا و یەمەن...هتد، لە ئاکامدا؛ کورد دەبێ پێش هەموو شتێک بیر لە ڕێکخستنەوەی ناو ماڵی خۆی بکات، هێزو لایەنە سیاسییەکان و گشت پێکهاتە جیاجیاکان لە ژێر چەتری دیموکراسیدا کۆبکاتەوە، تاکو بتوانێت بەرگری لە خۆی و ناسنامەکەی بکات و هەڕەشەی ئەقڵی شۆفینی لە سەر بوونی خۆی لە رۆژهەڵاتی ناڤیندا دووربخاتەوە.

ئەم وتارە دەربڕ لە ڕای نوسەر دەکات

AM:12:02:21/01/2021



ئه‌م بابه‌ته 259 جار خوێنراوه‌ته‌وه‌‌

وتارەکانی تری نوسەر